Kryeministri vlerëson rolin historik të Presidentit të Parë të Kosovës në shtetndërtim dhe ndërkombëtarizim
Kryeministri i Kosovës, Albin Kurti, ka përkujtuar sot 20-vjetorin e vdekjes së Dr. Ibrahim Rugovës, duke e cilësuar atë si Presidentin e Parë të Kosovës, lider të shquar politik, intelektual të angazhuar dhe studiues të spikatur të letërsisë.
Në mesazhin e tij përkujtimor, Kurti theksoi se periudha e pluralizmit politik, demokratizimit dhe ndërkombëtarizimit të çështjes së Kosovës është e lidhur pazgjidhshmërisht me emrin e Ibrahim Rugovës. Ai përkujtoi se Rugova ishte kryetari i parë dhe më jetëgjatë i Lidhjes Demokratike të Kosovës, që nga themelimi i saj më 23 dhjetor 1989 deri në vdekjen e tij më 21 janar 2006.
Sipas Kurtit, në vitet më të vështira për Kosovën, kur Serbia kishte vendosur një regjim apartheidi, Rugova u zgjodh President i Republikës së Kosovës më 24 maj 1992, duke udhëhequr një shtet që ende nuk njihej ndërkombëtarisht, përveç Shqipërisë. Ai arriti të imponohej si President legjitim, duke zhvilluar takime edhe me liderë botërorë, përfshirë presidentin amerikan Bill Clinton.
Kurti vlerësoi urtësinë politike të Rugovës dhe përkushtimin e tij ndaj rezistencës paqësore, që i hapi rrugë Kosovës në forume ndërkombëtare. Ai theksoi se Rugova kishte rol kyç në orientimin perëndimor të Kosovës dhe në ndërkombëtarizimin e drejtë të çështjes së saj, sidomos në vitet ’90.
Në mesazh përmendet edhe jeta personale e Rugovës. Ai lindi më 2 dhjetor 1944 në Cerrcë të Istogut dhe nuk e njohu kurrë babain e tij, i cili u zhduk nga shërbimi sekret jugosllav në janar të vitit 1945. Pas studimeve në Universitetin e Prishtinës, ku doktoroi në vitin 1984, Rugova punoi si studiues në Institutin Albanologjik, duke botuar dhjetëra punime shkencore.
Kurti theksoi se trashëgimia politike e Dr. Ibrahim Rugovës është e pranishme në të gjitha institucionet e Kosovës, nga LDK-ja te Kuvendi dhe Presidenca, duke e cilësuar atë si figurë të veçantë në historinë politike dhe kulturore të vendit.
“Ibrahim Rugova zë vend të veçantë në historinë e shtetndërtimit të Kosovës,” përfundoi Kurti, duke nderuar kujtimin e Presidentit të Parë të vendit.
