Kryetari i ri i PDK-së kërkon caktimin urgjent të zgjedhjeve, duke thënë se vendi ka nevojë për stabilitet dhe qeveri funksionale.
Kryetari i ri i Partisë Demokratike të Kosovës, Bedri Hamza, ka reaguar pas dështimit të njëpasnjëshëm të dy mandatarëve për formimin e Qeverisë, duke theksuar se kjo tregon qartë humbjen e mbështetjes politike të ekzekutivit aktual.
Sipas Hamzës, shumica që doli nga zgjedhjet e fundit është treguar e paaftë të krijojë institucionet e reja, duke shkaktuar “pasiguri institucionale, politike dhe shtetërore”.
Ai deklaroi se vendi tashmë ka vetëm një rrugë të përgjegjshme përpara: shkuarjen në zgjedhje të reja.
“Presidentja e vendit duhet ta caktojë sa më shpejt datën e tyre, sepse mjaft kohë kemi humbur,” u shpreh Hamza.
Kryetari i PDK-së shtoi se qytetarët duhet ta rikthejnë stabilitetin institucional përmes votës së tyre, në mënyrë që të krijohet një qeveri funksionale, reformuese dhe e përgjegjshme.
“Koha e fjalëve të mëdha ka përfunduar. Ka ardhur koha për një qeveri që punon,” përmbylli ai.
