Kryetari i AAK-së, Ramush Haradinaj ka reaguar ashpër pasi në Kuvendin e Kosovës u miratua parimisht projektligji për caktimin e pagës minimale, ku nuk përfshihen veteranët e UÇK-së.
Haradinaj tha se “sot është nje ditë e çuditshme në Kosovë, në Parlamentin e Kosovës”, raporton Gazeta Express.
“Jam i bundur që edhe Rrahman Morina sot do ia kishte lakmi Glauk Konjufcës dhe Albin Kurtit se ku larg kanë mbërri, se e kanë lënë prapa edhe atë. Sot e kemi pa një fitore të UDB-ashëve ose fëmijëve të UDB-së, e përkrahur edhe me votat e Listës Serbe e cila përjashton veteranët e UÇK-së nga Ligji për Pagën Minimale”, tha ish-kryeministri.
“Sot jemi dëshmitar që në Parlamentin e Kosovës është rikthyer Rrahman Morina, UDB-ja dhe Lista Serbe kanë votuar”, tha Haradinaj.
Kryetari i AAK-së tha se do ta vazhdojnë ta kundërshtojnë këtë projektligj.
Nën thirrjet “marre” nga deputetët e opozitës, në Kuvend u miratua në parim projektligji për pagën minimale. 68 deputetë votuan për projektligjin, gjashtë abstenuan dhe nuk pati asnjë votë kundër.
