Kryetari i Aleancës për Ardhmërinë e Kosovës, Ramush Haradinaj, ka kërkuar nga kryeministri i Kosovës, Albin Kurti, që ta rishikojë vendimin e tij për konvertimin e targave serbe në RKS, raporton Gazeta10.
Haradinaj ka thënë se Kurti duhet që t’i dëgjojë këshillat e vendeve mike.
Tutje, ai ka thënë se veprimi i tij nuk ka qenë largpamës dhe se mund të sjell pasoja për vendin.
Kreu i AAK-së ka thënë se Kurti duhet t’i analizojë mirë hapat në raport me marrëdhëniet me Perëndimin.
Haradinaj ka thënë se shpreson që zhgënjimi i aleatëve në këtë situatë të mos ketë pasoja për vendin.
Këtu keni statusin e plotë:
“KURTI T’I PËRFILLË KËSHILLAT E VENDEVE MIKE
Vendimi i fundit i Kryeministrit për targat, i paharmonizuar dhe i pakonsultuar me aleatët perëndimorë, posaçërisht me SHBA, është një vendim shkurtpamës e që mund të jetë edhe me pasoja për vendin.
Është e papranueshme kur ne u kërkojmë demokracive më të fuqishme të Botës të na ndihmojnë t’i japim fund mosmarrëveshjeve shekullore me Serbinë, dhe pikërisht kur ato janë në kulmin e angazhimit, kryeministri ynë vepron krye në veti e pa koordinim me partnerët strategjik.
Nuk mund t’u kërkosh vendeve mike ndihmë e të mos i përfillësh këshillat e tyre, aq më tepër kur ato, jo vetëm se të kanë marrë nën mbrojtje, por falë edhe angazhimit të tyre, Kosova sot është e lirë dhe e pavarur. Kjo është në kundërshtim edhe me traditën shqiptare.
Kryeministri duhet t’i analizojë mirë hapat e tij dhe në këtë fazë jetike për vendin duhet të jetë në harmoni të plotë me
Amerikën dhe BE-në. Andaj, i kërkoj ta rishikojë edhe vendimin për targat.
Dua të besoj se zhgënjimi i shprehur i partnerëve tanë me këtë vendim të kryeministrit, nuk do të ketë pasoja për marrëdhëniet e shkëlqyera që ka Kosova me ta!”, ka shkruar Haradinaj në llogarinë e tij në Facebook.
