Presidentja Vjosa Osmani ka nënshkruar pjesëmarrjen e Kosovës në Bordin e Paqes të presidentit amerikan Donald Trump, në një ceremoni të mbajtur të enjten në Davos të Zvicrës.
Para nënshkrimit, Osmani ia ka zgjatur dorën Trumpit dhe të dy kanë biseduar për disa sekonda.
Nënshkrimin për t’u bërë pjesë e këtij Bordi e kanë dhënë sot rreth 35 nga 50 vende të ftuara, ndërsa asnjë nga aleatët e Evropës Perëndimore nuk ka marrë pjesë.
Bordi i Paqes është një organ i ri ndërkombëtar i iniciuar nga Trumpi, i cili synon mbikëqyrjen e zbatimit të planeve të paqes në zonat e konfliktit, me fokus fillestar në Rripin e Gazës.
Sipas planit të paqes të Trumpit për Gazën, Bordi përshkruhet si një “organ i ri ndërkombëtar tranzitor”, që do të ndihmojë në mbikëqyrjen e rindërtimit të enklavës palestineze. Anëtarët e këtij bordi pritet të jenë udhëheqës botërorë, me presidentin Trump në krye.
Këshilli i Sigurimit i Kombeve të Bashkuara ka mbështetur zyrtarisht krijimin e Bordit të Paqes përmes një rezolute të hartuar nga SHBA-ja në muajin nëntor, duke i dhënë këtij mekanizmi peshë dhe legjitimitet ndërkombëtar.
Sipas statutit të propozuar, Bordi synon të “sigurojë paqe të qëndrueshme në zonat e prekura ose të kërcënuara nga konflikti”, jo vetëm në Gazë, duke bërë thirrje për krijimin e një organi ndërkombëtar për ndërtimin e paqes më fleksibël dhe më efektiv.
Lista e shteteve të ftuara përfshin Britaninë e Madhe, Rusinë dhe vende të tjera. Deri më tani, Franca, Norvegjia, Britania dhe Italia kanë refuzuar pjesëmarrjen.
Disa shtete kanë shprehur skepticizëm, edhe për shkak të kostos financiare. Për të siguruar një vend të përhershëm në Bordin e Paqes, secili shtet do të duhej të paguante më shumë se një miliard dollarë brenda vitit të parë për financimin e funksionimit të këtij organi, ndonëse ekziston mundësia e anëtarësimit.
