Kryeministri i Kosovës, Albin Kurti përmes një postimi në Facebook ka reaguar pas miratimit të Ligjit për Byronë Shtetërore për Verifikimin dhe Konfiskimin e Pasurisë së Pajustifikueshme, në Kuvendin e Kosovës.
Kurti, ka falënderuar deputetët që votuan pro kësaj duke theksuar se pasuria e fituar por që nuk arrin të justifikohet është përfitim i padrejtë, raporton Gazeta10.
“Hap pas hapi drejt Byrosë së Konfiskimit të Pasurisë së Pajustifikueshme. Me mbështetjen e 66 deputetëve të Kuvendit të Republikës, Ligji për Byronë Shtetërore për Verifikimin dhe Konfiskimin e Pasurisë së Pajustifikueshme mori edhe aprovimin e dytë për miratimin e tij të plotë. Falënderoj secilin dhe secilën prej tyre. Pasuria e fituar por që nuk arrin të justifikohet është përfitim i padrejtë, është padrejtësi, madje e tillë që thellon pabarazitë. Konfiskimi i saj është kompensim për shoqërinë, është drejtësi.”, ka shkruar kryeministri.
Tutje, Kurti ka postuar një fotografi e cila tregon rrugëtimin drejt themelimit të kësaj Byroje.
