Kryeministri Albin Kurti ka pritur sot në takim komandantin e Forcës së Sigurisë së Kosovës, gjeneralmajor Bashkim Jashari me të cilin ka biseduar për buxhetin e shtuar për mbrojtje për vitin 2022 dhe mbështetjen e FSK-së, në mënyrë që vendi ynë të ketë ushtri të pajisur sipas standardeve të NATO-s.
Në një komunikatë për media thuhet se në takim u diskutua për situatën e sigurisë në vend dhe në rajon.
“Në takim u bisedua për buxhetin e shtuar për mbrojtje për vitin 2022, dhe mbështetjen që Forca e Sigurisë ka nga Qeveria e Republikës së Kosovës, në mënyrë që vendi ynë të ketë ushtri të mirëtrajnuar e të pajisur sipas standardeve të ushtrive moderne të vendeve të NATO-s. Diskutuan për situatën e sigurisë në vend dhe në fqinjësi. Po ashtu, për zhvillimet në Ukrainë pas invazionit rus dhe agresionit ushtarak, nga i cili po zbulohen masakra të tmerrshme. Kryeministri Kurti dhe gjeneralmajori Jashari folën për planet konkrete drejt plotësimit të objektivave të përbashkëta, për ta bërë FSK-në forcë moderne që është e gatshme për mbrojtjen e vendit dhe kontributdhënëse për paqen, sigurinë dhe stabilitetin rajonal e global”, thuhet në komunikatën e Qeverisë.
