Kryeministri i Kosovës, Albin Kurti, ka dhënë një intervistë për Televizionin Publik të Portugalisë RTP, ku ndër të tjera a folur edhe për nevojën që Kosova t’i bashkohet NATO-s dhe BE-së.
Kurti me këtë rast tha se është tejet shqetësues bashkëpunimi i ngushtë ushtarak mes Rusisë dhe Serbisë gjatë viteve të fundit.
“Kremlini po përpiqet të përdor Serbinë si proksi për destabilizimin e Ballkanit. Ajo (Serbia) është duke blerë pajisje ushtarake nga Rusia. Nga 49 avionë luftarakë MIG-29 që i kanë, 8 kanë qenë donacion nga 6 nga Federata Ruse. Është krijuar një trupë ushtarake e përbashkët mes Rusisë dhe Serbisë dhe siç e shohim edhe në Ukrainë, i gjithë armatimi që është blerë nuk është vetëm për parada, por është për luftëra”, ka theksuar Kurti.
Kurti ka kritikuar shtetet e BE-së që deri tani e kanë neglizhuar përgatitjen e përbashkët ushtarake të Rusisë e Serbisë përgjatë viteve të fundit.
“Pajisjet ushtarake janë fazë përgatitore për makineri ushtarake. Shumë shtete të BE-së e kanë neglizhuar këtë përgatitje të përbashkët ushtarake mes Rusisë dhe Serbisë”, ka theksuar ai.
Ai më tutje tha se sa më parë që të përparojë integrimi i Kosovës, aq më i sigurt do të jetë rajoni.
“Kosova duhet t’i bashkohet NATO-s. Kosova duhet t’i bashkohet BE-së”, tha Kurti.
Gjithashtu, kryeministri Kurti, përmes televizionit portugez, ka kërkuar ndihmën e Portugalisë për të arritur te njohja e Spanjës. Ai ka kërkuar fillimisht njohjen e pasaportave dhe hapjen e zyrës ndërlidhëse spanjolle në Prishtinë.
Madridi nuk është Beograd dhe Spanja nuk është Serbia, ka thënë Kurti, përderisa ka folur për ngjashmëritë që mund t’i gjej shteti spanjoll në rastin e Kosovës me Kataloninë apo Baskinë.
Tutje ai shtoi se më e pakta që mund të bëjnë Spanja është njohja e pasaportave tona dhe hapjen e zyrave të tyre ndërlidhëse në Prishtinë.
“Minimumi që mund të bëjnë tani është të njohin pasaportat tona dhe të hapin zyrën e tyre ndërlidhëse në Prishtinë. S’ka paralele ndërmjet intervenimit të NATO-s 23 vjet më parë dhe tani, çfarë shohim në Ukrainë. Atëherë, forcat serbe zhvendosën jashtë Kosovës 860 mijë njerëz. 80% e popullatës ishte dëbuar nga shtëpitë e tyre, 12 mijë civilë të paarmatosur ishin vrarë, 10% e tyre fëmijë, 20 mijë gra janë dhunuar dhe 120 mijë shtëpi ishin shkatërruar apo djegur. Pra, kishte një gjenocid dhe NATO kishte ndërhyrë për ta ndalur”, shtoi Kurti.
