Kadri Kryeziu ka reaguar ndaj polemikave rreth zgjedhjes së Nenad Rashiqit si nënkryetar i Kuvendit nga radhët e Listës Serbe, duke theksuar se në rrafshin kushtetues nuk ka asnjë dilemë mbi ligjshmërinë e këtij emërimi.
Ai ka sqaruar se Kushtetuta e Kosovës nuk e lidh këtë pozitë me ndonjë parti specifike serbe, por kërkon që përfaqësuesi të jetë serb dhe të ketë fituar mandatin përmes njërit nga vendet e rezervuara, përcjell “Bota sot”.
Kryeziu shton se për sa kohë Rashiq i përmbush këto dy kushte dhe ka marrë mbështetjen e shumicës parlamentare, procedura është përmbyllur në përputhje me ligjin.
Shkrimi i plotë
Nëse Lista Serbe vendos ta sfidojë ligjërisht zgjedhjen e Rashiqit, ajo mund të mbështetet në Rregulloren e Kuvendit, e cila lë disa hapësira për manovrim juridik. Por nëse kthehemi te teksti i Kushtetutës — dhe Kushtetuta është akti burimor, i vetmi që ka peshë — atëherë bëhet e qartë se ajo nuk përcakton se cilës parti duhet t’i takojë nënkryetari i zgjedhur nga komuniteti serb.
Kushtetuta thotë vetëm një gjë: nënkryetari duhet të jetë serb.
Me fjalën “serb” nuk nënkuptohet vetëm përkatësia etnike — sepse nesër një serb mund të garojë edhe në kuadër të një partie shqiptare — por nënkuptohet një përfaqësues serb që ka garuar si pjesë e një partie të deklaruar dhe të njohur si parti serbe, e cila ka fituar një nga vendet e rezervuara për komunitetin serb.
Në rrafshin e pastër kushtetues, zgjedhja e Rashiqit është plotësisht e ligjshme. Ai i plotëson dy kriteret përmbajtësore që përcakton Kushtetuta: është deputet serb nga vendet e rezervuara dhe ka marrë më shumë se 61 vota të deputetëve të Kuvendit.
Kaq.
Mbaroi.
Urime!
