Kreu i NISMA-s, Fatmir Limaj ka kërkuar dorëheqjen e kryeministrit Albin Kurti pas takimit në Ohër.
Limaj e ka quajtur “ujdi” marrëveshjen e arritur në Ohër, duke thënë se kjo arritje është rezultat i politikave mashtruese e popullsite dy vjeçar të Kurtit.
Ai tutje ka thënë se nga marrëveshja për njohje reciproke, Kosova ka përfunduar në marrëveshje pa njohje dhe me Zajednicën.
Postimi i plotë i tij:
Ke humbur legjitimitetin, jep dorëheqje Albin!
Saktësisht katër ditë pa mbushur dy vite prej kur mori drejtimin e qeverisë, Albin Kurti do të mbahet mend dhe përgjegjës për dyfishimin e barrës së obligimeve të shtetit të Kosovës.
Ujdia e arritur mbrëmë është rezultat i politikave mashtruese e populiste dy vjeçare. Për më tepër, kjo marrëveshje është edhe ndëshkim për qasjen e tij për këtë proces.
Nga marrëveshja për njohje reciproke, Kosova përfundoi në marrëveshje pa njohje dhe me “Zajednicë”, brenda.
Kryeministri ka shkelë Kushtetutën e vendit dhe duhet të dorëhiqet menjëherë.
