Kandidati i Lëvizjes Vetëvendosje për kryetar të Mitrovicës, Faton Peci, ka kritikuar qeverisjen komunale në largim duke thënë se për katër vite nuk është bërë asnjë investim në tunelin e parë të qytetit.
Ai këtë e tha gjatë një takimi me qytetarët, ku u theksua se ky lokalitet është lënë pas dore, por do të jetë pjesë e projekteve investuese të qeverisjes së ardhshme lokale nëse ai merr drejtimin e komunës.
“Do të angazhohemi për renovimin e banesave të vjetra, rregullimin dhe menaxhimin e ujërave të zeza, largimin e mbeturinave si dhe mirëmbajtjen e infrastrukturës së gjelbërt,” u shpreh Peci.
Ai shtoi se këto dhe shumë projekte të tjera do t’i japin jetë vizionit të tij për Mitrovicën, duke theksuar se ekipi i tij ka dije, përvojë, guxim dhe përkushtim për ta udhëhequr qytetin.
