Spektakli më i ndjekur në Shqipëri, Big Brother VIP Albania, pritet të rikthehet shumë shpejt me sezonin e tij të pestë dhe, si zakonisht, rrjetet sociale janë ndezur nga zërat, hamendësimet dhe dëshirat për kastin e ri që do të hyjë në shtëpinë më të famshme të vendit.
Edhe pse Top Channel ende nuk ka bërë publike asnjë listë zyrtare me emrat e konkurrentëve, një nga personazhet që po përflitet fuqishëm është Salsano Rrapi. Aktori dhe moderatori i njohur ka konfirmuar së fundmi në një intervistë se ka marrë një ftesë për të qenë pjesë e këtij edicioni, por ka lënë gjithçka pezull, duke nxitur edhe më shumë spekulimet dhe pritshmëritë.
Përveç tij, fansat kanë hedhur në lojë edhe disa emra të tjerë që do të sillnin vërtet “zjarr” në format: Argjentina Ramosaj, Evi Reçi, madje dhe Donald Veshaj apo Einxhel Shkira, të cilët mund të rikthehen për të “shkundur” sërish shtëpinë. Megjithatë, këto mbeten në kuadrin e dëshirave dhe thashethemeve.
Producentët kanë premtuar risi dhe një kast surprizë, në përpjekje për t’i dhënë këtij sezoni intensitetin e paharruar të BB VIP 2, i cili për shumë ndjekës konsiderohet si kulmi i reality show-t në Shqipëri.
Me “live 24/7”, rrjetet sociale që do të shpërthejnë me meme, analiza, drama, romanca dhe debat pa fund, BB VIP 5 pritet të jetë një tjetër edicion i zjarrtë, ku loja për famë, dashuri dhe miliona klikime nis nga hyrja e parë.
