Chris Murphy, i cili është një nga tre senatorët amerikanë, bashkë me Jeanne Shaheen dhe Thom Tillis, të cilët para disa ditësh vizituan Kosovën, ku edhe zhvilluan takime me përfaqësuesit e shtetit, Presidenten Vjosa Osmani dhe Kryeministrin e Kosovës, Albin Kurti, është deklaruar për takimet që ka pasur me Kurtin dhe Osmanin.
Murphy, ka deklaruar se gjatë takimit me presidenten dhe kryeministrin, ata, ua kanë bërë të qartë liderëve kosovarë që duhet të arrihet marrëveshja mes Kosovës dhe Serbisë, në mënyrë që Kosova të bëhet anëtare e NATO-s dhe Bashkimit Evropian.
Ai ka shtuar se qeveritë as ajo e Serbisë por as kjo e Kosovës, nuk kanë bërë përparim të mjaftueshëm në procesin e dialogut, duke veçuar se qeveria e Kurti, sipas senatorit, ka qenë “kokëfortë rreth vazhdimit të bisedimeve”.
“Detyra jonë e dytë ishte t’i jepnim një mesazh të fortë qeverisë së re të Kosovës në takimet tona me Presidenten e re, Vjosa Osmani, dhe aktivistin e kthyer në kryeministër, Albin Kurti. Kosova do të dëshironte të anëtarësohej edhe në NATO edhe në Bashkimin Evropian, por që kjo të ndodhë, Serbia dhe Kosova duhet të arrijnë një marrëveshje në të cilën të dyja të njohin ekzistencën legale të shtetit tjetër. Një dialog drejt këtij qëllimi është në proces, por si qeveria serbe ashtu edhe ajo e Kosovës nuk kanë bërë përparim të mjaftueshëm dhe së fundmi, qeveria e Kurtit ka qenë veçanërisht kokëfortë rreth vazhdimit të bisedimeve”, ka thënë senatori Murphy.
Tutje, ai ka treguar se të tre senatorët amerikan ua kanë dhënë mesazh qeverisë Kurti që tu kthehet bisedimeve, siç tha ai, serioze me Serbinë.
“Brenda të dy takimeve, Shaheen, Tillis dhe unë ishim rigorozisht të qëndrueshëm në mesazhin tonë për nevojën për t’u kthyer në bisedime serioze me Serbinë. Për shumë çështje të brendshme, ne mund ta gjejmë veten lehtësisht në faqe të ndryshme. Unë jam një demokrat progresiv, senatorja Shaheen është një demokrate më e moderuar dhe senatori Tillis është një republikan konservator. Unë kam udhëtuar shumë herë më parë me Shaheen, por kjo ishte hera e parë që ne të tre punonim së bashku jashtë shtetit. Kimia jonë ishte e natyrshme dhe në takimet tona me Kurtin dhe Osmanin, mendoj se të dy u hutuan nga mesazhi i koordinuar dypartiak”, e përshkruan Senatori Murphy takimin me dy liderët kosovarë.
