Shefi i Grupit Parlamentar të Aleancës për Ardhmërinë e Kosovës, Besnik Tahiri, kërkon që nesër deputetët e Kuvendit të Kosovës ta votojnë Ligjin për Trustin.
Tahiri, mes tjerash, ka edhe dy porosi për deputetët e pushtetit, që po e kundërshtojnë këtë, njofton Sot News.
“Ata që po mundohen të na tregojnë që Trusti është për pleqëri, e kanë shumë gabim, sepse kjo është e ditur. Ne hallin e kemi se si këta njerëz ta mbërrijnë pleqërinë, në mungesë të dorës së shtetit në këtë situatë krize. Kontributdhënësit po i kërkojnë t’i marrin një pjesë të kursimeve të tyre për t’i zgjidhur disa probleme jetike, që i kanë në këtë gjendje të jashtëzakonshme”.
“Logjika me i thënë jo secilit propozim të opozitës, pa e dhënë asnjë arsyetim, është pazotësi, është ikje e përgjegjësisë dhe mbi të gjitha është mungesë e guximit për të marrë një vendim,” ka shkruar Tahiri në rrjetin social Facebook.
