Shefi i grupit parlamentar i PDK-së, Abelard Tahiri, tha se janë mbledhur 40 nënshkrime për themelimin e komisionit hetimor.
Ai shtoi se përmes këtij komisioni i cili sipas tij pritet të formohet në seancën e së enjtes, tha se do të zbardhen edhe punësimet që kanë ndodhur kohëve të fundit në KEK.
“Tashmë i kemi mbledhur 40 nënshkrime për themelimin e komisionit hetimor në raport me abuzimin që ka ndodh gjatë krizës së energjisë elektrike. Mazhoranca ka hezituar dhe e ka kundërshtuar formimin e një komisioni të tillë parlamentar. Është shumë e rëndësishme që të zbardhen të gjitha pretendimet që janë ngrit gjatë këtyre periudhave për abuzimin dhe keqpërdorimin e parasë publike, qoftë në blerjen e rrymës qoftë në prodhimin e rrymës nga KEK-u, dhe tashmë një pikë e re që do të jetë në këtë komision do të jetë edhe abuzimi me punësimet që kanë ndodhur kohëve të fundit në KEK”.
“Kërkesa jonë do të dërgohet sot tek administrata dhe besoj që të enjten do të themelohet komisioni sepse tashmë i kemi 40 nënshkrime. Ky komision hetimor parlamentar do të zbardhë shumë parregullsi dhe shumë të meta e abuzime që kanë ndodhur gjatë kësaj periudhe”, tha Tahiri, njofton Sot News.
