Veteranët po protestonin për disa orënë oborrin e Kuvendit, derisa shefi i PDK-së brenda, Abelard Tahiri, mbante në dorë orën “LONGINES” në vlerë të pensionit vjetor të veteranit.
Në ora 9:30, me rroba të zhubrosura e të vjetra, veteranët ia mësynë oborrit të Kuvendit për të protestuar kundër ligjit të ri të pagave.
Me këtë ligjin e ri, veteranëve përveç që s’ju rritet pensioni, një kategorie do t’ju zvogëlohej për 50 euro. Një veteran i papunë sot i merr 170 euro në muaj, apo 2 mijë euro në vit – sa ora e Tahirit, sipas tij.
Pas tri orëve protesta të veteranëve dhe Tahirit me kolegë, ligji nuk kaloi. E diku rreth orës 12:47, me orë në dorë, milioneri i PDK-së doli para veteranëve për t’ua kumtuar fitoren e vogël.
Derisa para kamerave fliste me gishtin lart dhe orën “Longines” në dorë, dikush nga komuniteti i twitterit u sigurua ta shpërndajë orën e Tahirit, për të cilën u tha se kushton 30 mijë euro, e dikush tjetër tha se kushton 51 mijë euro, meqë është e markës Patek Phlippe – ora më e shtrenjtë në treg.
E sot në orët e mesditës, Nacionale kontaktoi Abelard Tahirin, për ta pyetur rreth orës së tij, që dje e mbante në dorë.
Doli se ora e Tahirit s’është Patek Philippe, siç thoshin në twitter. Madje ai na dërgoi fotografi të orës.
“Është e pavërtetë, pa taksa e kam ble 1900 [euro]. Pa taksa jashtë shtetit, jo në Kosovë” – ka thënë Tahiri.
Me një kërkim të shpejtë në internet, gjetëm se ora e Tahirit në fakt kushton 3 mijë e 300 euro. Duket se shefi i PDK-së në Kuvend, e ka gjetur momentin e duhur në pazar.
Në anën tjetër, shefi i PDK-së nuk e ka deklaruar orën tek pasuria e paluajtshme.
Lidhur me këtë çështje, Tahiri tha se tash e ka blerë dhe se ora do të deklarohet si pasuri e luajtshme, vitin e ardhshëm.
“Jo [s’e kam deklaruar] se e kam ble tash, kjo deklarohet vitin tjetër. Këtë vit e kam ble, dhe deklarohet më 2023” – tha Tahiri në Nacionale.
Kur jemi te deklarimi i pasurisë, Abelard Tahiri, është ndër deputetët më të pasur, me mbi 1 milionë euro vetëm pasuri të paluajtshme.
