10:58 / 24 March 2023
Deputeti i LDK-së, Avdullah Hoti thotë se qytetarët e Kosovës janë mashtruar sa i përket dialogut, pasi sipas tij, koalicioni mes Albin Kurtit dhe Vjosa Osmanit i ka pasur disa kushte.
Përmes një shkrimi në Facebook, ai ka përmendur disa prej “premtimeve” të Kurtit e Osmanit para se të vinin në pushtet, derisa shton se të gjitha bien në kundërshtim me marrëveshjen e Ohrit. shkruan Insajderi.
Sipas tij vendi duhet të shkojë edhe njëherë në zgjedhje.
Reagimi i plotë:
Sa i përket dialogut, koalicioni Kurti-Osmani ka hyrë në kontratë me qytetarët e Kosovës më 14 shkurt 2021 me këto kushte:
- Nuk ka Zajednicë dhe asociacion, siç thoshin “as asi, e as ksi”.
- Nuk ka dialog pa kërkim falje.
- Nuk ka dialog pa zbardhjen e fatit të të pagjeturve.
- Rishikim/vlerësim i të gjitha marrëveshjeve të mëparshme.
- Dialog vetëm për marrëveshje finale për njohje reciproke.
- Reciprocitet me Serbinë në çdo gjë, që vendoset brenda javësh pas formimit të Qeverisë.
- Të njëjtat të drejta për shqiptarët në Luginën e Preshevës sikurse për serbët në Kosovë.
Marrëveshja e Ohrit bie në kundërshtim me të gjitha këto kushte. Njerëzit janë mashtruar. Duhet mandat i ri bazuar në këtë marrëveshje. Duhet të dalin edhe njëherë para qytetarëve me qëndrimet e reja të qeverisë.
