Zëvendëskryeministër i parë i Republikës së Kosovës, Besnik Bislimi, është takuar me presidentin e Malit të Zi, Milo Gjukanoviq.
Me anë të një postimi në Facebook, Besilimi ka treguar se me presidentin e Malit të Zi, kanë diskutuar për bashkëpunimin më të ngushtë mes dy qeverive, shkruan Sot News.
“Bashkë me Presidentin e Malit të Zi, Milo Gjukanoviq, diskutuam mbi bashkëpunimin më të ngushtë mes dy qeverive dhe për të lëvizur drejt nënshkrimit të marrëveshjeve ekonomike në të mirë të qytetarëve, mirëqenies së përgjithshme dhe zhvillimit ekonomik të të dyja vendeve. Kosova është e përkushtuar në përkrahjen e komunitetit malazez në Kosovë dhe mirëpret kontributin e rëndësishëm të tyre në zhvillimin e vendit”, ka thënë Bislimi.
Tutje, ai ka shtuar se e ardhmja e të dy shteteve është në Bashkimin Evropian.
“E ardhmja e dy shteteve tona është në BE. Përkushtimi ndaj Procesit të Berlinit dhe përmbushjes së agjendës evropiane, janë objektiva tona të përbashkëta. Bashkëpunimi rajonal është një prej mënyrave përmes së cilës konsolidojmë përafrimin e vendeve tona dhe angazhimin pozitiv ndaj fqinjësisë së mirë”, ka përfunduar Bislimi.
