Politologia Vjollca Hajdari tha se situata në Ukrainë ka bërë që lidershipi i politikës gjermane të intensifikojë procesin e dialogut Kosovë – Serbi
Për takimet e djeshme të Kurtit në Berlin, Hajdari tha ishin takime shumë të ngjeshura dhe shumë intensive. Ajo tha se është një nga rastet e rralla ku marrin pjesë edhe Kancelari Olaf Scholz, e edhe ministrja e Jashtme, Annalena Baerbock.
“Këtu janë duke u gërshetuar një sërë ngjarjesh, një sërë takimesh, të cilat po ndodhin paralelisht njëra me tjetrën, dhe kjo është një sinjal që Gjermania, në bashkëpunim me ShBA-në dhe BE-në është duke i dërguar Serbisë, në veçanti Rusisë, një sinjal të qartë se SHBA Gjermania dhe BE-ja janë pro stabilitetit në Ballkan, dhe pro politikës që ta kenë ende kontrollin në Ballkanin Perëndimor dhe më gjerë, i dërgoi një sinjal Rusisë se duhet të ketë kujdes me ndikimin e saj”, tha Hajdari.
“Kosova u paraqit krahas Serbisë si një shtet sovran, i të njëjtit nivel, dhe kjo nuk ishte një gjë që i konvenonte shumë Vuçiqit. Mua më erdhi mirë që Kurti u tregua i qartë në qëndrimet tij, por unë kam përshtypje se Kosova do të ketë kogja presion politik, do të duhet të bëj ca kompromise, dhe druaj se këto kompromise do të jenë shumë të dhimbshme për Kosovën”.
“Ne duhet të jemi shumë vigjilentë, që nën ndikimin rus të mos ketë edhe një lloj përshkallëzimi të situatës, por duhet të jemi vigjilentë edhe në qëndrimet tona. Nuk janë përmendur shumë gjëra, çështja e personave të zhdukur, shkëmbimi i territoreve, veriu, problemi i Ujmanit apo demarkacioni, në këto çështje duhet të jemi shumë vigjilentë”.
”Gjermania do të kërkojë goxha ca kompromise nga Kosova. Ca kërkesa që e kemi të vështirë t’i përbijmë ne si popull dhe si politikanë”.
