“Albin Kurti dhe demagogët e tij kanë vendos që të mos ecin rrugës që ua kërkon Amerika, e të ecin në një rrugë që është e paqartë se e kujt është”, ka thënë Kreu i Aleancës për Ardhmërinë e Kosovës, Ramush Haradinaj në një konferencë për media.
Haradinaj hodhi dyshime ndaj kryeministrit kur shtroi pyetjen se “i kujt është Albin Kurti dhe për kë punon ai” ndërsa e vlerësoi si krejtësisht kundër interesave kombëtare të Kosovës refuzimin e kërkesës së ShBA-së ndaj qeverisë për shtyrje dhjetë muajshe të çështjes së targave.
Ish-kryeministri Haradinaj tha se duhet “menjëherë” të aplikohet kërkesa amerikane deri në arritjen e marrëveshjes së propozuar në planin franko-gjerman.
“Ikja prej Amerikës është shkuarje në Moskë. S’ke ku shkon tjetër, vetëm në Moskë”, tha mes tjerash Ramush Haradinaj.
Duke folur për planin franko-gjerman, Haradinaj tha se aty në përmbajtje është njohja dhe kësaj marrëveshje, me lëvizje të gabuara, gjithnjë sipas tij, Albin Kurti po ia ndihmon Serbisë t’i shmanget asaj.
“Serbia, sponzorët e saj, satelitët e saj kanë skenare për dështimin e marrëveshjes tani të njohur si plani franko-gjerman që në përmbajtje ka njohjen e Kosovës nga Serbia. Në këtë situatë për fat të keq është kyç dhe po ndihmon kryeministri Albin Kurti”.
Kërkesën amerikane ndaj Kosovës për pezullim të zbatimit të vendimit për targat, Haradinaj e sheh në funksion të mbajtjes së presionit në Beograd, derisa, sipas tij, kryeministri veproi përkundrazi.
