Avdullah Hoti, deputet i Lidhjes Demokratike të Kosovës, ka thënë se qasja e komisionerit për Zgjerim, Oliver Varhelyi, është vetëm arsyetim për të vonuar liberalizimin e vizave për Kosovën.
Hoti, përmes një postimi në Facebook, ka shtuar se, qëndrimet e dy vendeve të BE-së që janë kundër liberalizimit të vizave për qytetarët e Kosovës, janë rezultat i dinamikës së brendshme politike që ata kanë, shkruan lajmi.net.
Tutje, deputeti i LDK-së ka thënë se Kosova i ka përmbushur të gjitha kushtet dhe e meriton liberalizimin e vizave.
Postimi i plotë i Hotit:
Qëndrimet e dy vendeve të BE-së për të mos liberalizuar vizat për kosovarët, qëndrime të cilat janë krejtësisht rezultat i dinamikës së tyre të brendshme politike, nuk duhet lejuar të ngriten në nivel të çfarëdo udhërrëfyesi të ri për liberalizim të vizave për Kosovën. Qasja e Komisionerit për Zgjerim, Oliver Varhelyi, është vetëm arsyetim për të prolonguar më tej këtë vendim të BE-së.
Kosova i ka përmbushur të gjitha kushtet që nga marsi i viti 2018 dhe meriton t’i liberalizohen vizat.
Për të bindur Francën, në vitin 2020 është ngritur grupi punues i Ministrive të Brendshme respektive për të vënë në dispozicion të insiticioneve fanceze informatat e nevojshme për vendimmarrje pozitive. Ky grup punues është vendosur të formohet në takimin që kemi pasur me Presidentin Macron në korrik 2020, duke ndjekur shembullin e mirë të Qeverisë Haradinaj me Gjermaninë në vitin 2019. Ky grup e ka kryer punën e vetë dhe tani duhet pritur vendimi pozitiv, sepse nuk ka më asnjë kusht që duhet të plotësohet nga Kosova.
