Kryeministri i vendit, Albin Kurti, ka takuar ish-shefin e Misionit Verifikues të OSBE-së, Ambasadorin William Walker, me të cilin folën për Masakrën e Reçakut dhe dëshminë e tij për këto ngjarje.
Bëhet e ditur se gjatë takimit, Kurti i shprehu mirënjohje Walkerit për angazhimin në mbështetje të së vërtetës dhe drejtësisë, por edhe për kontributin në përkujdesjen dhe promovimin e ndihmës ndërkombëtare gjatë periudhës së luftës në Kosovë.
“Theksoi rolin domethënës dhe proaktiv të Qeverisë së Kosovës në përpjekjet për ta bërë të mundur botimin e librit të memoarëve të Ambasadorit Walker, i cili dokumenton ngjarjet e tmerrshme të Masakrës së Reçakut”.
“Kryeministri Kurti shtoi se ky libër dhe këto dëshmi të Ambasadorit Walker do të shërbejnë si një mjet për promovimin e së vërtetës për Kosovën dhe për forcimin e narrativës ndërkombëtare që vendi ynë ka përjetuar gjenocid nga ana e shtetit të Serbisë. Vepra si ky libër na ndihmojnë të ruajmë kujtimin e ngjarjeve të tmerrshme si masakra e Reçakut”, thuhet në njoftimin e qeverisë.
Më tej, sipas qeverisë, libri i Ambasadorit Walker për Masakrën e Reçakut, pasqyron perspektivën e ngjarjeve që ndodhën më 15 janar 1999 në fshatin Reçak.
“Ai është një akt i rëndësishëm që kontribuon në dokumentimin dhe shpërndarjen e dëshmive autentike për krimet e kryera nga regjimi i Serbisë në Kosovë, duke çuar përpara njohjen ndërkombëtare të gjenocidit që ka ndodhur në vendin tonë gjatë periudhës së luftës”.
“Libri kujton viktimat e masakrës së Reçakut dhe nderon të gjithë ata që dhanë jetën për lirinë e Kosovës. Pavarësisht 26 viteve të kaluara, Qeveria e Kosovës dhe populli ynë mbeten të angazhuar për të siguruar që e vërteta të mos harrohet kurrë dhe që përgjegjësit për gjenocidin të përballen me drejtësinë”, thuhet në njoftim.
