Shkruan Lirim Gashi
Kryemyftiu i Bashkësisë Islame të Kosovës Naim Ternava, në një fjalim prekës dhe të zjarrtë para xhematit të tij, me rastin e 633-vjetorit të vdekjes së ish pushtuesit të shqiptarëve Sulltan Muratit, e quajti këtë të fundit hero të Zotit dhe çlirimtar të kombit.
Nuk kemi pse të habitemi nëse nesër ose pasnesër ndonjë ,,shqiptar i ndershëm” e quan Sllobodan Millosheviqin hero të Zotit dhe çlirimtar të kombit.
Çlirimtar të kombit nga kush?
Natyrisht nga shqiptarët e pandershëm.
Dhe kush ishin për Millosheviqin shqiptarët e pandershëm ?
Natyrisht Ukshin Hoti, Adem Demaçi, Adem Jashari, Hidajet Hyseni, Jakup Krasniqi e kështu me radhë….
Dhe kush ishin për Millosheviqin shqiptarët e ndershëm ?
Natyrisht Rrahman Morina, Ali Shukriu, Kol Shiroka, Sejdo Bajramoviçi, Isa Mustafa e kështu me radhë….
Po ashtu, nuk duhet të çuditemi nëse ndonjë “shqiptar i ndershëm” sipas standardeve të Millosheviqit, nesër apo pasnesër e quan NATO-n dhe KFOR-in ushtri okupatore.
Tek ne, të gjitha gjërat e pamundura janë gjithmonë të mundura, sepse jetojmë në një vend të krimeve dhe tradhtive të pamundura që për shpirtrat e shitur janë ilaç shërues.
Vetëm se këtij ilaçit shërues i vjen era pleh deveje dhe opinga çetnikesh.
Kur kësaj ia shtojmë edhe fyerjet e përditshme të imamëve të ndryshëm të Bashkësisë Islame të Kosovës në llogari të Gjergj Kastriotit, atëherë na vizatohet para syve të verbër rruga të cilën e kemi marrë.
Dhe kjo është rruga që na çon në Ligën Arabe, nëse ajo na pranon fare, sepse edhe atje duhet të përmbushen disa standarde dhe kritere.
Por nëse vazhdojmë kështu, atëherë duhet ta harrojmë sa më parë Brukselin e ndoshta edhe Uashingtonin.
