Njohësi i çështjeve ekonomike Safet Gërxhaliu, vlerësoi se vendimi për dinarin është marrë në kohë dhe rrethana të gabuara, dhe vulosje afatgjate e masave dhe sanksioneve përballë Kosovës.
“Nuk e ka Kosova komoditetin që të eksperimentojë në këtë mënyrë në kohën kur ka sanksione apo masa ndëshkuese nga Bashkimi Evropian. Nuk e ka luksin dhe besoj që është nguti të bëjë një veprim të tillë në kohën kur po shihni edhe SHBA-të edhe Evropa i ka sytë dhe presionin kah dialogu dhe zgjidhja përfundimtare apo arritja e një marrëveshje”, tha Gërxhaliu, derisa përmendi edhe se SHBA-të dhe BE-ja hyjnë në zgjedhje.
Më tej ai shtoi se një gjë e tillë është nuk i bën nder Kosovës, në kohën kur pritet një largim i sanksioneve dhe në kohën kur po kërkohet arritje e marrëveshjes.
“Është diçka që ka ndjeshmëri dhe provokon. Besoj se Kosova ka humb dhe do të humb në aspektin ekonomik, politik… Ky vendim do të jetë një vulosje afatgjate e masave dhe sanksioneve përballë Kosovës”, tha Gërxhaliu.
Sipas Gërxhaliut ky vendim është më shumë elektoral, që siç vlerësoi ai do t’i ofrojë më shumë vota partisë në pushtet.
