Pal Lekaj paralajmëron protesta ndaj Qeverisë Kurti

Deputeti i AAK-së, Pal Lekaj, ka paralajmëruar protesta të mëdha kundër qeverisë, nëse ajo provon që ta implementojë Asociacionin e Komunave Serbe me kompetenca ekzekutive.

Lekaj ka thënë se për AAK-në, e pranueshme është vetëm një asociacion pa kompetenca ekzekutive.

“Ne mendojmë që mund të ketë Asociacion pa kompetenca ekzekutive. Mund të mblidhen disa komuna që mbrojnë interesat e komunave, por me një asociacion me komptentca ekzekutive s’e përkrah. Nëse vjen deri aty, edhe protesta edhe veprime politike, gjithçka do të bëjmë që të mos lejojmë një Asociacion të tillë. Me të gjitha mjetet, edhe me protesta edhe me veprime politke”, ka deklaruar ai.

Lekaj ka thënë se Kurti ka ndryshuar rrënjësisht pas ardhjes në pushtet,

“Po çuditem, a është ai Kurti i njëjtë, apo ka ndryshuar rrënjësisht dhe negativisht. Si mund ta quash një kryeministër që dikur e kundërshtonte fuqishëm marrëveshjen me Serbinë, tani marrëveshjen për Elektroseverin e legjitimon”, ka deklaruar tutje Lekaj.