Shefi i grupit parlamentar të PDK-së, Abelard Tahiri, ka bërë të ditur se po punojnë për konsensus që të shpërndahet Kuvendi i Kosovës.
Tahiri ka thënë në një konferencë pas mbledhjes së Kryesisë së Kuvendit, që zgjedhjet nëse ka konsensus mund të mbahen më 30 qershor ose 7 korrik.
“Jemi në periudhën, afatet e fundit kohore kur duhet të procedohet me mocionin për shpërndarje të Kuendit, në mënyrë që vendi ynë t’i drejtohet kutive të votimit më 30 qershor ose 7 korrik. Duhet të kapen afatet kohore për 30 qershor ose 7 korrik”, tha Tahiri.
“Jemi në një komunikim intensiv me të gjitha palët në mënyrë që këto data mos t’i humbim dhe Kosova të shkojë në zgjedhje më 30 qershor ose 7 korrik. Ne nuk e kemi fuqinë të vetëm, e kemi thënë në vazhdimësi gjitha dëmet e pasojat që po i vuajmë sot si qytetarë të vendit për shkak të qeverisjes së dobët, degraduese dhe është mirë që së bashku këtë dakordim, këtë gjuhë të përbashkët si opozitë ta finalizojmë me seancë javën tjetër, sot një javë kryesia të caktojë datën për shpërndarjen e Kuvendit në mënyrë që të kapim datat 30 qershor ose 7 korrik”, tha aii.
